Máltøknidepilin er ein depil undir Føroyamálsdeildini á Fróðskaparsetri Føroya.

Á Máltøknideplinum verður arbeitt við gransking og menning av føroyskari máltøkni, sum er tvørvísindalig fakgrein. Sostatt er depilin staðsettur á Føroyamálsdeildini og virkar í tøttum samstarvi við Náttúruvísindadeildina. Á deplinum starvast í løtuni eitt vísindastarvsfólk og eitt verkætlanarsett hjálparfólk, umframt tilknýttur adjunktur.

Máltøknidepilin røkir og mennir eitt máltøkniligt undirstøðukervi við dátum og tilfari. Tilfarið verður støðugt dagført og ment, og verður atkomuligt til ymisk máltøknilig endamál. Endamálið við hesum er at stuðla og vera lopfjøl fyri menningina av máltøkni á føroyskum.

Á deplinum granska vit, hvørjir arbeiðshættir og mannagongdir fáa bestu úrslit og taka støði í føroyskum umstøðum. Vit arbeiða við at menna smá máltøknilig amboð, sum kunnu stuðla málbrúkarum. Máltøknidepilin samstarvar eisini við stovnar og fyritøkur í Føroyum sum uttanlands, og alt arbeiði hjá deplinum er grundað á eina hugsjón um opinleika í tilfari, menning og gransking.